9 மாவட்டங்களை தவிர்த்து உள்ளாட்சி தேர்தல் நடத்த உச்சநீதிமன்றம் அனுமதி

உள்ளாட்சி தேர்தல் தொடர்பாக ஏற்கனவே வெளியிட்ட அறிவிப்பை உச்சநீதிமன்றம் ரத்து செய்தது. எஞ்சிய மாவட்டங்களில் தேர்தல் நடத்துவது தொடர்பாக புதிய அறிவிப்பை வெளியிட உச்சநீதிமன்றம் உத்தரவு பிறப்பித்துள்ளது.

புதிதாக பிரிக்கப்பட்ட 9 மாவட்டங்களை தவிர எஞ்சிய மாவட்டங்களில் உள்ளாட்சி தேர்தல் நடத்த உச்சநீதிமன்றம் அனுமதி வழங்கியுள்ளது. 

தமிழகத்தில் கிராமப்புற உள்ளாட்சி அமைப்புகளுக்கு டிசம்பர் 27 மற்றும் 30 ஆகிய தேதிகளில் இரண்டு கட்டங்களாக தேர்தல் நடத்தப்படும் என மாநில தேர்தல் ஆணையம் கடந்த 2ம் தேதி அறிவித்தது. இதைத் தொடர்ந்து இன்று (6ம் தேதி) வேட்புமனு தாக்கல் தொடங்க இருந்தது. 

இந்நிலையில் வார்டு மறுவரையறை பணிகளை சரியாக முடிக்காததால் உள்ளாட்சி தேர்தல் அறிவிப்பாணையை ரத்து செய்ய வேண்டும் என உச்ச நீதிமன்றத்தில் திமுக தரப்பில் கடந்த இரு நாட்களுக்கு முன்னதாக புதிய மனு ஒன்று தாக்கல் செய்யப்பட்டது. 

இந்த வழக்கு விசாரணையில், தமிழகத்தில் வார்டு மறுவரையறை பணிகள் எதுவும் முடிக்கப்படாமல் உள்ளது. இதுபோன்ற சூழலில் தான் தற்போது மாநிலம் முழுவதும் 9 புதிய மாவட்டங்கள் துவங்க அறிவிப்பு வெளியிடப்பட்டுள்ளது.

அங்கும் அவசர கதியில் தான் அனைத்து பணிகளும் முடிக்கப்பட்டுள்ளது. குறிப்பாக இப்போது உள்ள நிலையில் வாக்களர்களுக்கு தாங்கள் எந்த தொகுதியில் இருக்கிறோம் என்பது கூட தெரியவில்லை. இது அவர்களது வாக்கு சுதந்திரத்தை பறிக்கும் செயலாகும் என திமுக தரப்பு தெரிவித்தது.

தொடர்ந்து தமிழக அரசு சார்பில் வாதிட்ட வழக்கறிஞர், மாநிலத்தில் வார்டு மறுவரையறை அனைத்தும் முடிந்த பின்னர் தான் அதிகாரப்பூர்வமாக தேர்தல் அறிவிப்பு வெளியிடப்பட்டது.

இதில் தேர்தல் நடைமுறை என்பது அமலுக்கு வந்த பின்னர் அதற்கு தடை விதிக்கும் அதிகாரம் நீதிமன்றத்திற்கு கிடையாது. இதில் மனுதாரர் தரப்பில் கூறுவது போன்று புதிய மாவட்டங்கள் தான் பிரச்னை என்றால் அதற்கு மட்டும் தேர்தலை நிறுத்தி வையுங்கள். ஒட்டு மொத்தமாக தடை விதிக்க வேண்டாம் என வாதிட்டார்.